Period bis e Freiden: Wa Reen, dann am warscheinlechsten haut – mee just ganz lokal

Duerch ee klengt Déif, wat mat séngem Kär knapp ëstlech vun eis läit, gëtt et haut um Mëttwoch bësse méi wollekeg an d’Warscheinlechkeet vu ganz enk begrenzte Schliet geet an d’Luucht.

Well et sech dës Kéier also erëm méi ëm POTENZIELL lokal enk begrenzt Schliet handelt a net ëm groussflächege Reen, rechnen d’Wiedermodeller all mat eppes aneren. Den amerikanesche Modell GFS rechent mat tëscht 1 a 5 l/m², dat meescht soll am äusserste Süde vum Land erofkomme. Méi wäit ëstlech vu Lëtzebuerg, am Beräich Tréier, gi Wäerter vu bis zu 23 l/m² gerechent.

Den europäesche Modell ECMWF ass mat 0 bis 2 l/m² dobäi, déi däitlechst Nidderschlagssignaler ginn et iwwert dem äusserste Norde vum Land. Och laanscht de Westen ass d’Warscheinlechkeet erhéicht. De franséischen ARPEGE simuléiert 0 bis 1 l/m², iwwert der Nordhallschent gëtt dee meeschte Reen gerechent. Ongeféier am selwechte Beräich gesäit den däitschen ICON tëscht 0 an 2 l/m².

Wou et an de nächste Stonne reent, ka kee viraussoen. Eréischt wann d’Schliet schonn um Radar ze gesi si, léisst sech kuerzfristeg soe, wéi staark se sinn a wouhin se zéien.