Réckbléck: Déi markantst Orkandéifer aus de leschte Wanteren

Mir kucken zréck op déi vergaange Wanteren an op hir markantst Orkandéifer. Dëst ass eng Zesummeféierung aus zwou Episoden vum Reen a Bou, all Freides géint 09:45 Auer LIVE um Radio 100,7.

En Orkan ass en aussertropescht Déifdrockgebitt – en entsteet also net am Beräich vun den Tropen, mee meeschtens iwwer dem nërdlechen Atlantik. D’Saison geet vum Hierscht bis an de spéidere Wanter mat eran – dat wéinst den Temperaturdifferenzen tëschent der Polarregioun an den Tropen.

Hei kënnt Dir dësen Artikel lauschteren (éischt Hallschent)

D’Atmosphär probéiert dës Differenzen auszegläichen, wat de Grond dofir ass, datt et haaptsächlech an de genannte Méint zu méi kräftegen Déifdrockgebitter an eben och Orkandéifer komme kann.

D’Beaufort- Skala

Wann déi gemëttelt Wandvitess e Wäert vun iwwer 118,53 km/h iwwerschratt huet, schwätzt ee vun engem Orkan. Handelt et sech derbäi just ëm e Wandstouss, da vun engem Orkanstouss. Dës Wandvitess entsprécht der Wandstäerkt 12 op der Beaufort-Skala.

Orkanaarteg gëtt et awer scho bei Wandstäerkt 11, wou Wandvitesse vun tëschent 103,71 an 118,53 km/h optrieden. Bléist de Wand an der Moyenne mat engem Wäert, deen tëschent dëse Vitesse läit, gëtt vun engem orkanaartege Stuerm geschwat. Bei engem Wandstouss vun engem orkanaartege Wandstouss.

2020: D’Orkandéif SABINE

De Stuerm, deen a leschter Zäit am meeschten Opmierksamkeet kritt huet, war d’Orkandéif Sabine. De Stuerm huet sech de 7. Februar 2020 entwéckelt an huet an der Nuecht vum 9. op den 10. Februar 2020 säi Maximum erreecht.

Déi héchst Wandvitess gouf mat 219 km/h op der franséischer Hallefinsel Cap Corse am Mëttelmier areecht. An Däitschland louch de Maximum bei 176 km/h um Feldberg am Schwarzwald. Op zweeter Plaz ass de Brocken mat 173 km/h an op der Drëtter de Fichtelberg mat 150 km/h.

Déi genannte Bierger leien all op iwwer 1.200 Meter iwwer dem Mieresspigel. Am Flaachland gouf et de Maximum zu Fürstenzell bei Passau mat 155 km/h. Mühldorf am Inn war mat 131 km/h dobäi, an der Stad München konnten 119 km/h festgestallt ginn.

Bei eis zu Lëtzebuerg konnt un der ASTA-Wiederstatioun zu Reiler de Maximum mat 111 km/h gemooss ginn. Also nëmmen en orkanaartege Wandstouss, keen Orkanstouss. No hannendru war d’Kachelmannstatioun zu Ell mat 109 km/h, duerno Wolz mat 107 km/h a Beetebuerg mat 104 km/h.

De Stuerm ass bei Wäitem net sou markant ausgefall, wéi en hätt kéinten. Déi meescht Modeller ware sech nämlech sécher, datt groussflächeg op d’mannst orkanaarteg Wandstéiss hätte kënnen optrieden. A Wierklechkeet hu sech déi markant Wandspëtzten awer just op e puer eenzel Géigenden am Land fixéiert. Lokal war tatsächlech net vill vun engem Stuerm ze spieren. Trotz deem méi schwaach ausgefalene Stuerm sinn iwwer 2.000 Noutriff agaangen – glécklecherweis gouf et nëmme materielle Schued.

Wanter 1990: Staark Stierm zu Lëtzebuerg

Datt Lëtzebuerg awer scho bei Wäitem méi staark Stierm matgemaach huet, gesäit een, wann ee méi wäit an d’Vergaangenheet kuckt. Besonnesch markant ass et am Wanter 1990 zougaangen, wou eng ganz Serie vu Stierm Lëtzebuerg am Grëff hat. Lassgaangen ass et mam Orkandéif Daria, deen Enn Januar 1990 vum Atlantik hier iwwer déi brittesch Inselen an duerno weider iwwer d’Nordséi gezunn ass.

De 25. Januar 1990 ass et un der Wiederstatioun vum staatleche Wiederdéngscht MeteoLux fir e Wandstouss vun 122 km/h duergaangen. An eiser direkter Ëmgéigend goufen awer nach méi héich Wäerter erreecht: Ooche war deemools beispillsweis mat 150 km/h dobäi, Tréier mat 136 km/h a Saarbrécke mat 130 km/h.

Den nächste Stuerm huet net laang op sech waarde gelooss. D’Randdéif Judith ass den 8. Februar 1990 iwwer Lëtzebuerg ewechgezunn an huet d’Virgängerin DARIA wat d’Wandvitessen uginn nach e Stéck getoppt. Bis zu 130 km/h konnte gemooss ginn – sechs Persoune goufe schwéier blesséiert, eng ass ëm d’Liewe komm. Zu Tréier huet de Wand mat bis zu 151 km/h geblosen.

Nach dee selwechte Mount, de 26. Februar 1990, ass eng richteg Serie vu Stuermdeeg lassgaangen – eng änlech Konstellatioun gouf et zanterdeem net méi, op alle Fall net mat där Intensitéit. Den Ufank huet d’Orkandéif Vivian gemaach, duerch deen hei am Land zwou Persoune blesséiert goufen. A ganz Europa goufe 64 Stuermaffer gezielt, dovu 15 an Däitschland. Déi maximal Wandspëtzt an Däitschland ass um Wendelstein, also um Alperand, mat 265 km/h opgetrueden. An der Schwäiz goufen um Jungfraujoch souguer 285 km/h registréiert.

Vum 26. Februar 1990 bis den 1. Mäerz 1990 hate mir et all Dag mat Orkan ze dinn. Um Findel gouf de Maximum mat 146,3 km/h erreecht, den 28. Februar 1990 duerch d’Stuermfeld vum Orkandéif Wiebke. Et ass bis haut den héchste Wandstouss, dee jeemools un der MeteoLux- Statioun um Findel gemooss gouf. D’Wiebke huet eist Wieder vun der Nuecht op den 28. Februar bis den 1. Mäerz 1990 beaflosst a war den Héichpunkt vun der Stuermserie. 35 Persoune si gestuerwen, hei zu Lëtzebuerg ware sechs Blesséierter ze bekloen.

Zweeten Deel

Dat waren dräi vun de schlëmmste Wanterstierm, déi an de leschten 30 Joer iwwer Europa gezu sinn. Nodeems mir gesinn haten, wat e Wanterstuerm iwwerhaapt ass, ginn haut nach e puer weider Stierm ënner d’Lupp geholl, un déi sech vill Leit bestëmmt nach erënnere kënnen. De Philippe Ernzer start am Februar 1990.

Lëtzebuerg huet schonn eng ganz Partie Stierm hannert sech, géint déi d’Stierm aus de leschte Wochen bal net der Ried wäert waren. Um Schluss vun der leschter Episod koume mir op den Orkan WIEBKE ze schwätzen – e Stuerm, deen Deel vun enger ganzer Orkanserie war.

Deemools, an der Nuecht vum 28. Februar op den 1. Mäerz 1990, gouf en Orkanstouss vun 146,3 km/h gemooss – déi héchst jeemools gemoosse Wandvitesse bei eis am Land. 440 Mol hunn d’Rettungsdéngschter missen ausrécken, och d’Lëtzebuerger Arméi war mat 100 Zaldoten am Asaz. Och am Verkéier goung net méi all ze vill – 169 Stroossen hu misse vun de ville Beem, déi ëmgefall ware, fräigeraumt ginn. Glécklecherweis gouf den Héichpunkt vum Stuerm an der Nuecht areecht. Anerefalls wiere méiglecherweis méi Leit zu Schued komm. Elleng an der Fiels goufe 39.000 Kubikmeter Bëschfläch zerstéiert – genee wéi och 5 Prozent vun der ganzer lëtzebuergescher Bëschfläch op de gesamte Wanter 1989/1990 gekuckt.

E weidere besonnesch markante Stuerm war d’Orkandéif LOTHAR – dofir musse mir awer 9 Joer an d’Zukunft reesen. De 25. Dezember 1999 huet sech de Stuerm iwwert der Biskaya entwéckelt an huet dunn haaptsächlech de 26. Dezember fir grousse Schued gesuergt. De LOTHAR war e Randdéif – also e klengt Déif, wat um Rand vun engem gréisseren Déif entsteet. D’Randdéif deemools war Deel vun engem groussen Déifdrockkomplex iwwer Island an dem nërdlechen Atlantik – änlech wéi mir et och schonn dëse Wanter e puer Mol gesinn hunn.

De Kär vum Déif koum iwwert de Westen resp. Nordweste vu Frankräich eran an ass weider a Richtung Ost-Nordost gezunn. De 26. Dezember 1999 ass de Stuerm mat sengem Kär genee iwwer Lëtzebuerg ewechgezunn, dat mat engem Kärdrock vu nëmme 971,2 hPa. Och zu Tréier konnt de selwechte Wäert gemooss ginn. Well de Kär ebe genee iwwer Lëtzebuerg ewechgezunn ass, hu sech d’Wandvitesse bei eis nach a Moosse gehale. 123 km/h goufen deemools zu Perl am Saarland gemooss, zu Tréier waren et 107 km/h. Nërdlech vum Déif, wat gläichzäiteg och nërdlech vu Lëtzebuerg war, goufe grad emol 80 km/h registréiert.

D’Haaptstuermfeld ass awer e gutt Stéck méi wäit südlech duerchgezunn. Zu Saarbrécken huet de Wand mat 128 km/h geblosen an zu Idar-Oberstein mat 139 km/h. Déi héchst Wandvitessen an der Reechwäit vu Lëtzebuerg gouf et zu Karlsruhe mat 153 km/h an am Weinbiet mat 183 km/h – wat scho bemierkenswäert ass, well d’Statioun op 553 Meter iwwert dem Mieresspigel steet.

Fir de korrekte Lafwee vum Déif virauszesoe, muss deemools zimmlech schwiereg gewiescht sinn. De LOTHAR war nämlech net nëmmen e Randdéif, mee och nach e Schnellleefer. En ass nämlech vu Chrëschtdag 1999 bis de 27. Dezember ee mol vun der Franséischer Küst bis a Polen gezunn a war also zimmlech séier ënnerwee. Wier de Kär vum Déif e bësse méi wäit nërdlech gezunn, da wieren och bei eis zu Lëtzebuerg Wandvitesse vun iwwer 130 km/h méiglech gewiescht. E Stuermdéif dréit säi Stuermfeld nämlech meeschtens südlech vum Kär mat sech.

E puer weider Wandwäerter vun deemools weise, wéi zolidd de LOTHAR war. De stäerkste Wandstouss gouf an Däitschland um Hohentwiel, engem 686 Meter héijem Bierg, mat 272 km/h gemooss. Um Wendelstein, deen 1838 Meter héich ass, konnten 259 km/h festgestallt ginn. Um Feldberg am Schwarzwald huet eng Wiederstatioun 212 km/h gemooss, ier awer dunn de Stroum ausgefall ass. An der Schwäiz war de Jungfraujoch mat 249 km/h dobäi, um Zürecher Uetilberg waren et 241 km/h. An Éisträich louch de Maximum bei 218 km/h a gouf um Feuerkogel gemooss.

Duerch de Stuerm, mee och bei den Opraumaarbechte, sinn ëm 110 Persounen ëmkomm, dorënner 88 a Frankräich. Mat abegraff sinn dobäi och d’Stuermaffer vum Stuerm MARTIN, deen den Dag drop iwwert de Süde vu Frankräich ewechgezunn ass.

De LOTHAR huet am ganze fir iwwer 6 Milliarden USD Versécherungsschued gesuergt. En zielt zu de weltwäit deierste Versécherungsfäll, déi stuermtechnesch op weltwäiter Basis just vum Hurrikan ANDREW aus dem Joer 1992, dem Taifun MIREILLE am Joer 1991, dem Hurrikan KATRINA am Joer 2005 an dem Hurrikan HARVEY am Joer 2017 iwwertraff ginn.

Mir gi weider an de Januar 2007, wou mir et tëscht dem 15. an dem 18. Januar mam Orkan KYRILL ze dinn haten. Anescht wéi beim LOTHAR, hat de KYRILL e vill méi groussen Aflossberäich an huet wäit Deeler vun Europa beanträchtegt. Et goufe Wandvitesse vu bis zu 225 km/h areecht, de Schued beleeft sech op ongeféier 10 Milliarden USD, alleng 5,5 Milliarden an Däitschland. De versécherte Materialschued gëtt op 5,3 Milliarden USD geschat. Deemools si 47 Mënschen ëm d’Liewe komm, iwwer eng Millioun Leit hate wärend enger kuerzer Zäit kee Stroum méi. Vill Betriber mee och Schoulen hu besonnesch den 18. Januar 2007 hir Dieren zougelooss, a Mëtteleuropa gouf de Verkéier op der Bunn groussflächeg agestallt.

Am stäerksten huet de Wand deemools a Groussbritannien, Norde vu Frankräich, de BeNeLux- Staaten an och der Schwäiz geblosen, ier d’Stuermfeld weider op Däitschland an Éisträich iwwergegraff huet. Déi héchst Wandspëtzt gouf, wéi virdru scho kuerz betount gehat, mat 225 km/h um Aletschgletscher an der Schwäiz op 2850 Meter iwwert dem Mieresspigel registréiert. Desweidere waren d’Nordséiküsten och staark betraff, zu Sylt gouf nämlech en Orkanstouss vun 141 km/h gemooss. Um Kindelsberg, engem Bierg a Nordrhein-Westfalen deen op 618 Meter iwwert dem Mieresspigel läit, goufen 205 km/h areecht.

Bei eis zu Lëtzebuerg ass et fir orkanaarteg Stuermstéiss duergaangen, allerdéngs awer net fir Orkanstéiss – also Wandstéiss vun 118 km/h un. De Maximum gouf mat 115 km/h zu Ëlwen gemooss, 113 km/h zu Beetebuerg an 100 km/h zu Stengefort. Obwuel den Aflossberäich vum KYRILL immens grouss war, koum Lëtzebuerg méi oder manner gutt aus der Saach eraus.