Schnéidéif-Fuerplang: Et bleift spannend bis zum Schluss!

Den amerikanesche Wiedermodell GFS ass mat sengem Owes-Laf mat Schnéiquantitéite vun tëscht 5 an 10 cm op de Koppen am Norden dobäi, iwwer d’Mëtt sollen et der tëscht 3 a 6 sinn a südlech vun der Sträif Simmern, Schous a Konsdref soll et séier op tëscht 1 a 5 cm erofgoen wann ee vun do aus a Richtung Rescht vum Süde vum Land kuckt. D’Muselgéigend hätt dëser Léisung no am mannste Schnéi bis hin zu kengem Schnéi ze erwaarden, änleches wier fir de Raum Fréiseng an Esch-Uelzecht de Fall.

De GFS rechent de Kär vum Randdéif genee iwwer Lëtzebuerg.

Fir ze vergläichen: de Modelllaf aus dem Virmëtten huet fir de Norde nach lokal 12 cm Schnéi berechent, och am Süde wieren op mannst 2 cm dra gewiescht. De Grond dofir: d’Déif gouf e bësse méi staark gerechent, zousätzlech dozou hätt de Kär sollen e Stéck südlech vum Land laanschtgoen.

Den europäesche Wiedermodell ECMWF war an de leschte Stonnen en immens launesche Kandidat. De neiste Modellaf, gesäit et elo sou, dass de Kär vum Déif net nëmmen e klengt Stéck südlech u Lëtzebuerg laanschtzitt, mee e gréissert. Dëst hätt den Effekt, dass et bei eis zwar zu liichte Schnéiquantitéite kéim, mee dat allermeescht definitiv op der franséischer Säit vun der Grenz Frankräich/Lëtzebuerg fale géif.

Bis an de Samsdemoien era rechent den aktuellen ECMWF also, dass d’Schnéicouche folgendermoossen ausgesi soll: am Raum Ettelbréck, Dikrech, Beaufort, Larochette, Konsdrëf, Gonnereng, Wecker bis erof op Nidderaanven gëtt quasi näischt bis hin zu héchstens 1 cm gerechent. Och de Raum Fréiseng hätt dat selwecht ze erwaarden. Wat de ganze Rescht vum Land ugeet, wieren op mannst 1 bis 2 cm dran. De meeschte Schnéi géif dem no dann am äusserste Norden a Nordweste mat tëscht 1 a 4 cm zesummekommen, d’selwecht wéi am Südweste vum Land am Raum Nidderkuer.

Fir ze vergläichen: de Modelllaf aus der Nuecht huet iwwerall am Land mat enger zouener Schnéicouche vun tëscht 7 an 11 cm gerechent, ausser ganz un der Nordspëtzt vum Land; do war e mat 4 cm dobäi. De Grond: d’Positioun vum Déif gouf do e minimalt Stéck méi wäit nërdlech berechent, an dat och vill méi intensiv.

De franséische Wiedermodell ARPEGE taascht sech lues a lues un eng Léisung erun, déi nach e gutt Stéck anescht ausgesäit wéi vun deenen anere Modeller. Dësem no zitt de Kär vum klengen Déif iwwert déi nërdlechst Deeler vu Lëtzebuerg ewech, wat virun allem Deeler vun der Äifel zolitte schnéifall brénge géif. Wat heescht dat fir Lëtzebuerg? Bis muer de Moie rechent de Modell un der Nordspëtzt vum Land mat enger Schnéicouche vun tëscht 5 an 10 cm, iwwerdeems et a Richtung Nordosten a Nordwesten ëm 3 cm wieren. Fir de Süde géif et schlecht ausgesinn, dat grad emol mat quasi näischt bis hin zu allerhéchstens 2 cm.

Fir de vergläichen: De Modell-Laf vu virdrun huet de Kär genee iwwer Lëtzebuerg gerechent, dat mat deels méi zolitte Nidderschléi. Esou wier, laut fréierer Berechnung, am äusserste Norden eng Schnéicouche vun ëm 17 cm zustane komm. De Gros vun der Nordhallschent hätt op mannst 5 cm kritt, iwwerdeems och den Osten an d’Muselgéigend mat bis zu 4 cm dobäi gewiescht wier. Den äusserste Süden hätt mat ëm 3 cm verweilt.

Den däitsche Wiedermodell ICON ass zimmlech eenheetlech ënnerwee a berechent mat sengem neiste Modell-Laf quasi iwwerall gläichméisseg Quantitéite vu bis zu 3 cm (an den Däller bësse manner). Laut dësem Modell zitt d’Randdéif e gutt Stéck méi wäit südlech vun der franséischer-lëtzebuergescher Grenz duerch, wat heescht, dass de meeschte Schnéi ausserhalb vun eisem Land erofkéim.

Fir ze vergläichen: De Modell-Laf aus dem Virmëtten huet de Kär genee un der Grenz berechent, wouduerch nach eng Couche vun tëscht 3 a 5 cm am Norde simuléiert gouf, am Süde wiere mir mat tëscht 1 bis 3 cm dobäi gewiescht.