Westwiederlag bréngt ëmmer erëm Déifdrockgebitter
Iwwer Mëtteleuropa läit de Moment eng Déifdrock-Strooss, déi esou séier net a sech zesummefale wäert. Just e Samsden iwwer gëtt et e kuerze Moment, wou mir ënner liichten Héichdrockafloss geroden. E Sonnden ass dat awer schonn erëm eriwwer a mir geroden op e Neits ënner Déifdrockafloss.
De Verlaf
Haut um Donneschden hu mir et schonn mat engem spierbare Wand ze dinn, zäitweis si Spëtzte bis 65 km/h net ausgeschloss. Méi markant soll et de Modellrechnunge no awer muer um Freide ginn, besonnesch vum Nomëtten/Owend un. Well et sech ëmt e Randdéif handelt, falen d’Berechnunge vun den eenzelne Modeller ëmmer nach mat gréisseren Ënnerscheeder aus, an awer sollten d’Wandvitessen tëscht dem Freidenomëtten a Freidenowend tëscht 60 a 75 km/h anzegrenze sinn – op exponéierte Plaze si verschiddene Modeller no och mol Vitesse bis ëm 80 km/h net ausgeschloss.
E Samsde setzt jo dann erëm héije Loftdrock an, deen sech e Sonnde schonn erëm verzitt. De Wand gëtt erëm méi spierbar, sollt awer mat Maximalvitesse vun ëm 65 km/h net Stuermstäerkt erreechen.
Interessant gëtt erëm de Méinden: Den europäesche Modell ECMWF rechent besonnesch vum spéidere Nomëtten u mat Stuermstéiss vun tëscht 75 a 95 km/h, wat schwéiere Stuermstéiss entsprécht.
Den amerikanesche Modell GFS gesäit schonn fir méi fréi am Dag, tëscht dem fréie Moien an dem fréie Nomëtte, Vitesse vun tëscht 65 an 80 km/h op eis duerkommen. Den däitschen ICON orientéiert sech zäitlech méi um europäesche Modell, vun der Intensitéit hier gëtt en awer dem amerikanesche Modell d’Hand.