Loftmassegrenz suergt op ee Neits fir Chancen op Schnéi
An de nächsten Deeg läit déiwe Loftdrock iwwert dem Mëttelmierraum, iwwerdeems mir et mat héijem Loftdrock iwwer Skandinavien an och Russland ze dinn hunn. Duerch d’Stréimungsmuster, wat doduerch zustane kënnt, gerode kill Loftmassen an eis Géigenden. Dem neiste Stand no soll sech eng kleng Loftmassegrenz forméieren, déi vum Freidenomëtten bis an de Samsden eran fir Schnéischauere suerge kann. Dovu betraff ass eng Sträif vum ëstlechen & südëstlechen Däitschland bis an de Westen eran – ugrenzend zu Lëtzebuerg also.
Situatioun méiglech bis warscheinlech, mee nach net sécher
De Weekend, an domat och de relevanten Zäitraum, si keng dräi Deeg méi fort – d’Modellkaarten déi fir dësen Artikel verwäert goufe gehéieren also schonn der Kuerzfrist un, also deem Zäitraum, an dem eng Prognos ëmmer méi sécher gëtt. An awer ginn et tëscht de Modeller nach Differenzen, déi een mat abezéie soll.
Den optimisteschste Modell ass momentan den europäeschen ECMWF. Dëse gesäit an der Nuecht op de Samsde besonnesch op de Koppe vum Land déi éischt Schnéischaueren erofkommen. An de méi nidderege Lage kann et mol Schnéireen sinn, soss awer meeschtens Reen. Fir d’Koppe gëtt eng Schnéicouche vun 2 bis 5 cm berechent – fir éierlech ze sinn, ass den ECMWF an de meeschte Fäll ze optimistesch. Dohier einfach mat Virsiicht genéissen.
Den amerikanesche Wiedermodell GFS rechent just mol geréngfügegt geflackels, dat am selwechten Zäitraum. De neiste Laf huet de Schnéi esouguer méi wäit an Däitschland eragedréckt, wat heescht, dass d’Chancen dësem Modell no änlech geréng ausfalen wéi fir den 20. November.
Den däitsche Wiedermodell ICON gesäit vum spéidere Freidenomëtten un vun Osten hier d’Warscheinlechkeet vu Schnéireen laanscht de Südoste vum Land/Musel. Vun do aus soll sech de geréngfügege Nidderschlag bis an de spéideren Owend eran ëmmer méi wäit och an de Rescht vum Land resp. Norden verlageren. Trotz dem bësse Geflacks rechent de Modell mat kenger Akkumuléierung um Buedem.
De franséischen ARPEGE ass änlech ënnerwee wéi den ICON, just minimal méi intensiv wat d’Nidderschléi betrëfft. Berechent gëtt allerhéchstens en dënne Flom op den Erhéijungen.