Wéi vill reent et nach?
Fänke mir mam Reen un… wéi vill reent et iwwerhaapt nach? Bis 10 Auer huet et am Weste vum Land, wéi virausgesot, bis ewell am meeschte gereent. Un der ASTA-Statioun waren zu där Zäit schonn 26 l/m² erofkomm, am mannste naass ass/war et un de Statioune Béiwen beim Stauséi an zu Schengen mat grad emol 9 l/m². Kuckt ee sech déi aktuell Radarbiller awer esou un, da mierkt ee séier, dass et dat nach laang net war mam Reen.
Wann een déi rezent Kuerzfristmodeller ënnert d’Lupp hëlt, da kënnt een vun elo un bis Mëtternuecht bei nachemol tëscht 12 a knapp 30 l/m² eraus. Am realisteschsten ass déi gesond Mëtt. Trotzdeem dréit dëst zu enger ugespaanter Situatioun a Saachen Héichwaasser bäi. Halt do och gären inondations.lu am Aen.
Muer um Mëttwoch reent et virun – dat awer net méi grad esou flächendeckend wéi haut, mee méi am Stil vu Schaueren. Dës Schauere kënnen ëmmer nach kräfteg ausfalen. Der momentaner Auswäertung no hätte mir tëscht 6 an 23 l/m² ze erwaarden. Am Westen/Nordwesten soll dat meescht dovun erofkommen. Och dëst dréit nachemol zu de Peegele bäi.
A wéi ass et mam Wand?
D’Modeller stinn där Fro zwar ëmmer nach e bëssen differenzéiert géigeniwwer. Generell kann een awer soen, dass et bis muer den Owend zäitweis richteg lëfteg bis hin zu stiermesch ka ginn. Sou vun haut ronderëmt 17 Auer bis en Donneschden Mëtternuecht sinn ëmmer erëm Phasen dobäi, an deenen et zu stiermesche Vitessen vun tëscht 60 a 75 km/h kënnt.
Sollt sech awer eng méi kräfteg Schauer drënner mëschen, wat jo muer méiglech ass, da kéint och punktuell begrenzt d’Warnschwell vu >75 km/h iwwerschratt ginn. Verschidde Modeller gesi Vitesse vun ëm 85 km/h, mee dat wieren definitiv Ausnamen.