Grousswiederlag
De Weekend iwwer erwaart eis eng Mëschung aus héijem an déiwem Loftdrock – d’Wieder ass deemno also net besonnesch gutt, mee awer och net schlecht. Haaptsächlech um Samsde leie mir e bësse méi ënner Déifdrockafloss, well een Déifdrockgebitt vun den Alpen hier a Richtung Polen zitt – deen Dag, un deem bei eis déi “héchst” Warscheinlechkeet vu Reen besteet.
Freiden, 30. Abrëll 2021
De Freidemoien ass et meeschtens wollekeg, d’Temperature leien tëscht 1 a 4 Grad a klammen am Virmëtten op 5 bis 9 Grad erop. Et ass ëmmer nach wollekeg, mee et bleift wäitgoend dréchen. Mëttes an am Nomëtte gi Maximaltemperature vun tëscht 11 a 15 Grad areecht, de Wand bléist mat Spëtzte vun 20 km/h aus Südwesten. Et bleift wollekeg, just heiansdo weist sech d’Sonn dotëscht. Um Owend an an der Nuecht ginn d’Temperaturen op tëscht 2 a 4 Grad zréck, et ass ëmmer nach oft wollekeg: Tendenz ofhuelend.
Samsden, 01. Mee 2021
De Samsdemoien ass et liicht wollekeg bis bedeckt, d’Temperature leien tëscht 4 a 6 Grad a klammen am Virmëtten op 8 bis 12 Grad erop. Et bleift wollekeg, ganz lokal ass mol eng eenzel Schauer net ausgeschloss. Mëttes an am Nomëtte si Maximaltemperature vun tëscht 11 a 16 Grad areecht, de Wand bléist schwaach bis liicht spierbar aus Nord-Nordosten. An de Spëtzten ass e mat 30 km/h ënnerwee. Et bleift bedeckt, ganz lokal si Schauere méiglech – net flächendeckend. Um Owend an an der Nuecht ginn d’Temperaturen op tëscht 4 a 7 Grad zréck, et bleift wollekeg mee d’Warscheinlechkeet vun eenzelne Schauere geet zréck.
Sonnden, 02. Mee 2021
De Sonndemoien ass et liicht wollekeg bis bedeckt, d’Temperature leien tëscht 4 a 7 Grad a klammen am Virmëtten op tëscht 7 bis 10 Grad erop. Mëttes an am Nomëtte gi Maximaltemperature vun tëscht 10 a 15 Grad areecht, de Wand bléist schwaach bis zäitweis spierbar aus Nordwesten. An de Spëtzten ass e mat 35 km/h ënnerwee. Et bleift wollekeg, mat Chance ass ee sonnege Moment dotëscht. Um Owend an an der Nuecht ginn d’Temperaturen op tëscht 1 a 3 Grad zréck, et bleift liicht wollekeg.