Nom YINXING elo den TORAJI
Nach virun e puer Deeg hate mir iwwert den Taifun YINXING beriicht, deen en Donneschden am äusserste Norde vun de Philippinen u Land gaangen ass. Kuerzzäiteg hat en dobäi esouguer d’Intensitéit vun engem Supertaifun erreecht, wat gemëttelte Wandvitesse vun 240 km/h entsprécht. Op atlanteschem Mier wier dëst en Hurrikan vun der véierter Kategorie gewiescht. An Tëschenzäit läit de YINXING 230 Kilometer ëstlech vun Hainan ewech a beweegt sech op de Vietnam zou. Aktuell produzéiert de Stuerm nach duerchschnëttlech Wandvitesse vun 140 km/h a wäert sech an de nächsten Deeg weider ofschwächen. Et ass domat ze rechnen, dass de Stuerm en Dënschden a Form vun Iwwerreschter vun engem Tropestuerm ongeféier bei Quy Nho’n am Vietnam u Land geet.
D’Philippine sinn awer elo op e Neits a Gefor: Gëschter Moien huet sech den Tropestuerm TORAJI forméiert, deen zanter gëschter Mëtten e schwéieren Tropestuerm ass – am Atlantik wier et den Equivalent zu engem Hurrikan. An Tëschenzäit läit de Stuerm 250 Kilometer südëstlech vun de Philippinen a packt et an der Moyenne op Wandvitessen vun 140 km/h. An der Nuecht op muer erreecht d’Aen vum Stuerm d’Land, ongeféier am Raum Dilasag. Bis dohi kéint en sech esouguer nach e bësse verstäerken, an der Moyenne wieren da Vitesse vun 155 km/h net ausgeschloss.
Tropestuerm MAN-YI & Invest 94W
En drëtten Tropstuerm läit aktuell 1000 Kilometer ëstlech vun de nërdleche Marianeninselen. Dësen erreecht gemëttelt Wandvitessen vu 85 km/h, ass also net esou intensiv – an awer ass et der Definitioun no en Tropestuerm – den drëtten momentan aktiven am westleche Pazifik.
Dëse Stuerm kéint geschwënn Gesellschaft kréien: 360 Kilometer süd-südwestlech vu Guam läit eng tropesch Depressioun, déi provisoresch als “Invest 94W” gekennzeechent ass. Et besteet eng héich Warscheinlechkeet, dass aus dëser eraus an de nächste 24 Stonnen e weideren Tropestuerm entsteet. Geschitt et séier genuch, da wieren dat am Ganzen véier Tropestierm am Westpazifik, an dat zur selwechter Zäit – en immens rart Bild!