Onsécherheeten duerch Randdéif
Schold un de groussen Onsécherheeten ass e Randdéif, wat um Freide viraussiichtlech knapp südlech mat sengem Kär u Lëtzebuerg laanschtschramme wäert. D’Modeller sinn zwar quasi all der Meenung, dass et südlech laanschtzitt – mee déi Fro, déi fir gréisser Ännerunge suerge kann ass déi, wéi wäit südlech et wierklech duerchzitt. Un Zenarien stinn zur Auswiel: Eenzel Flacken, staarke Schnéifall am ganze Land, nëmme Reen (Dauerreen) oder och Stuerm. Op mannst dat mam Stuerm sollt awer zimmlech sécher net an d’Spill kommen, wann d’Kaarten esou bleiwe wéi elo.
Prognose si schwéier
Egal wat ech elo nach hei schreiwen, fest steet: esouguer um Freidemoie wäert kee Mensch soe kënnen, wéi genee den Dag verleeft. Zitt d’Déif nëmmen e puer 100 Kilometer oder esouguer manner wéi virausgesot un eis laanscht, kann dat ganz grouss Auswierkungen op eist Wieder hunn.
Amerikanesche Wiedermodell GFS
Den amerikanesche Wiedermodell GFS rechent, dass d’Déif wierklech ganz knapp hannert der franséischer Grenz laanschtschramme soll. Ugoe soll et um fréie Moie mat Reen, deen dann vum spéidere Virmëtten un am ganze Land an zolitte Schnéifall iwwergoe soll. Och eng groussflächeg Schnéicouche soll méiglech sinn, berechent ginn tëscht 2 an 8 cm – de Maximum esouguer iwwert dem zentrale Lëtzebuerg a mol net am Norden. Wat d’Gesamtnidderschlagsquantitéiten ugeet gëtt mat tëscht 20 an 30 l/m² gerechent.
Europäesche Wiedermodell ECMWF
Dem ECMWF no zitt d’Déif um Freide nëmmen e klengt Stéck méi wäit südlech duerch, wéi dat wat vum amerikanesche GFS berechent gëtt. Doduerch géif zwar dat ganzt Land ënner flächendeckendem Reen leien, deen sech och als Dauerreen entpuppe kann, mee de Schnéifall wier dann méi eppes fir d’Südhallschent vum Land. Dëse kéint dann och, esou wéi de GFS et gesäit, zimmlech zolitt ausfalen. Kuerzzäiteg sollen an dëse Gebitter tëscht 1 an 3 cm Neischnéi méiglech sinn. Dëse Modell ass just mat 6 bis 12 l/m² ënnerwee, wat keng warnrelevant Situatioun ze bedeiten hätt.
Däitsche Wiedermodell ICON
Den däitsche Modell ICON gesäit esouguer, dass sech an dësem klenge Randdéif op eemol esouguer zwee Kären opdoe sollen. Den éischte géif am fréie Nomëtte nach méi wäit südlech duerchzéie wéi den ECMWF et gesäit an den zweeten wier erëm e Stéck méi wäit nërdlech ënnerwee. Den éischte Kär géif dem Land kräftegen Dauerreen bréngen, a Richtung Nomëtten och déi éischt Flacken op Plazen am Norden mee awer och am Süde vum Land. Den zweete Kär géif dann esou richteg déi méi kill a fiicht Loftmasse vum Atlantik opschëppen an eis esou bis ganz erof zolitte Schnéifall bréngen. Leie bleiwe sollt dann haaptsächlech just an der Nordhallschent eppes, tëscht 1 a 4 cm gi berechent.
Franséische Modell ARPEGE
Den ARPEGE kënnt dem ICON am noosten a gesäit och en zweete Kär, dee knapp südlech un eis laanschtgoe soll. Den éischte soll eis kräftegen Dauerreen op Lëtzebuerg bréngen, den zweeten dann verstäerkte Schnéifall bis wäit erof. Wat d’Reequantitéiten ugeet ass e mat 10 bis knapp 30 l/m² ënnerwee, d’Schnéihéichte géife sech bis Mëtternuecht (Nuecht op de Samsden) op tëscht 1 an 4 cm bezifferen – queesch duerch d’Land verdeelt.