De Freiden zielt zwar fir déi meescht nach net als Weekend – ziele mir en awer mat dobäi, dann ass et vun den dräi Deeg definitiv den ongemittlechsten duerch vill Reen & e stiermesche Wand. Iwwert den Dag verdeelt kënnen erëm plazeweis ëm 10 l/m² Waasser vum Himmel kommen, iwwerdeems eis erëm e weidert Wandfeld passéiert. An de Spëtzte kënne mol ëm 75 km/h erreecht ginn. Vum Owend u léisst de Reen no, komplett dréche sollt awer bis an d’Nuecht eran ëmmer nach net bleiwen. D’Temperature klammen op e Maximum vun tëscht 10 an 13 Grad.
E Samsde leie mir ëmmer nach ënnert där selwechter Grousswiederlag, um “Modus” ännert sech also net vill. Et si vill Wolleken ënnerwee, 8 bis 10 Grad ginn erreecht. Et si vill Wolleken ënnerwee, eenzel Schauere kënnen ëmmer nach virkommen. An de Spëtzte packt et de Wand op tëscht 30 a 45 km/h, lefteg bleift et also. E Sonnden erwaart eis en änlechen Dag mat ville Wolleken, heiansdo sinn erëm Schaueren dobäi. Iwwerdeems den europäesche Modell just e leftegen Dag gesäit, gesäit den amerikanesche GFS d’Warscheinlechkeet, dass mir am Laf vum Owend erëm ënnert e méi markant Wandfeld geroden – Stuermstéiss bis 85 km/h wieren doduerch méiglech. Détailer dozou gëtt et awer wuel eréischt kuerz virdrun, well et sech ëmt e klenge Schnellleefer handelt. Wat d’Temperaturen ugeet beweege mir eis dagsiwwer tëscht 8 an 11 Grad.
