Rare Phänomeen an der leschter Nuecht: Sprong vu 15° op bal 24°C, lokal stiermesch

An der Nuecht gouf et wärend enger kuerzer Zäit erëm bal esou waarm wéi am Dag, also gutt 24°C – begleet vun engem lokal stramme Wand. Mee wéi ass dat méiglech?

An der vergaangener Nuecht gouf et op verschiddene Plaze vum Land en interessante Phänomeen. Géint Mëtternuecht bis hin zu bal 2 Auer ass den Thermometer vu verschiddene Statioune staark geklommen, iwwerdeems d’Loftfiichtegkeet staark erofgaangen ass. Wa mir d’Kachelmann-Statioun vu Waasserbëlleg huelen, dann hate mir um 23:50 Auer 15,5°C, eng Stonn duerno waren et awer 23,4°C – wat fir Ufank Abrëll wierklech immens bemierkenswäert ass.

Dozou schéngt et dann verschiddene Meldunge no och nach plazeweis op klengstem Raum zu méi kräftege Wandstéiss komm ze sinn, och wann d’Donnéeë vun de Statioune sech a Grenzen halen. E gutt Beispill gëtt d’Statioun vun Tréier-Zewen of, wou den Thermometer vu 17°C op 24,4°C geklommen ass, iwwerdeems stiermesch Wandstéiss vu 67 km/h opgetruede sinn.

All dat sinn Indicen op e sougenannten “Heat Burst”. Dës entstinn am Beräich vu sech ofschwächenden Donnerwieder. An dësen fale grouss Päck u kale Loftmassen aus grousser Héicht op de Buedem. Dës ginn duerch d’Loftmasse ronderëm zesummegepresst an erwierme sech. Um Buedem forméiert sech e Wandfeld mat waarmer Loft.

An dësem Fall hei war et wuel eng “Light”-Versioun dovun. Am Héichsummer kënnen dobäi am schlëmmste Fall Wandvitesse vu wäit méi wéi 100 km/h dobäi sinn.